நனவோடை...

ஆற்றினைக் கடந்து ஏரிக்கு
அன்பு மகனை அரவணைத்து...
கோடியினின்று வழிந்து வரும் நீர் பார்த்து
அப்பா... இந்த தண்ணீர் எங்கு போகும்?
அழகாய் ஒரு கேள்வி...
ஆற்றுக்கு என பதில் சொல்ல,
ஏரிக்கு எங்கிருந்து வரும்?
ஆற்றிலிருந்துதான் பதிலால்
அதிகம் குழம்ப, சொன்னேன்...
மலையில் பெய்த மழையால்
ஆற்றில் வெள்ளம், அணைகட்டி
ஏரியில் நிரம்பி வழிந்தோடி
ஆற்றில் மீண்டும்.
ஆறிலிருந்து எங்கு செல்லும்?
அடுத்த கேள்வி, கடல் சொல்ல
கடலின் பின் கருத்தாய் கேட்க
ஆவியாதல், மேகம், மழை, ஆறு...
ஓ...சுத்தி சுத்தி... புரிந்து மகிழ்வில்.
அடுத்துமொரு கேள்வி அவசரமாய்...
அப்பா பூச்சி எப்படி கண்டுபிடிக்கும்
அதன் குட்டிகளை, எல்லாம் ஒரே மாதிரியாய்...
விழிக்க, உடன் அடுத்த கேள்வி
பூச்சி எப்படி தூங்கும்?
தூக்கம் போயிற்று எனக்கு.